Shkup, 17 janar 2022 (MIA) – Nga fillimi i janarit 2022 deri dje, për 16 ditë, numri i rasteve aktive është rritur për mbi 11.000. Nëse më 31 dhjetor 2021 numri i rasteve aktive ishte 5006, dje ishte 16132. Përqindja e pozitivitetit gjatë fundjavës është rreth 22 për qind.

Gjatë 24 orëve të kaluara janë regjistruar 1348 raste të reja me KOVID-19 nga 6141 testime ose 21.9 për qind. Nga numri total pozitiv 1348, janë regjistruar 145 riinfeksione.

Deri më tani në vend janë kryer gjithsej 1.706.696 testime të KOVID-19. Numri i përgjithshëm i personave të diagnostikuar me Kovid që nga fillimi i epidemisë është 244.632, numri i të shëruarve është 220.400, numri i të vdekurve është 8.100, ndërsa numri i rasteve aktive është 16.132, gjysma e të cilëve janë në Shkup.

Sipas analizave epidemiologjike për momentin në Shkup janë 8609, pastaj vijon Manastiri me 1456, Prilepi 890, Kumanova 580, Ohri 565, Kavadari 413, Strumicë 321, Velesi 317. Në qytetet tjera ka nën 300 të infektuar, ndërsa në Dojran ka vetëm shtatë raste aktive.

Për shkak të tendencës rritëse të personave pozitivë me KOVID-19 me përhapjen e shpejtë të omikronit, autoritetet pritet që këtë javë të njoftojnë nëse do të fillojë me kohë gjysma e dytë e vitit shkollor 2021/2022, në çfarë mënyre mësimi do të zhvillohet ose do të ketë shtyrje.

Në javët e fundit, zyrtarët e shëndetësisë kanë vërejtur se presioni ndaj spitaleve është ulur për sa i përket shtrimeve, por ekzaminimet ambulatore janë shtuar, duke arritur deri në njëqind pacientë në ditë në një institucion.

Në periudhën prej datës 06.08.2021 deri më 13.01.2022 në territorin e vendit si pozitivë me KOVID-19 janë testuar 85.593 qytetarë, prej të cilëve 37 për qind janë vaksinuar plotësisht, pra 32.079 persona. Sipas statistikave të muajve të kaluar, 53.514 qytetarë, përkatësisht 63 për qind e KOVID-19 pozitivëve nuk janë vaksinuar. Analiza e Ministrisë tregon se shkalla e vdekshmërisë tek të pavaksinuarit është shumë më e lartë.

Më shumë se 327 milionë njerëz në mbarë botën janë infektuar me koronavirus, më shumë se 5.5 milionë kanë vdekur dhe rreth 267 milionë janë shëruar.

Organizata Botërore e Shëndetësisë (OBSH) njoftoi dje se ka dorëzuar një miliard doza në kuadër të programit Kovaks deri më tani.

OBSH ka kritikuar prej kohësh shpërndarjen e pabarabartë të vaksinave dhe u bëri thirrje prodhuesve dhe vendeve që t’i japin përparësi programit Kovaks.

Numri i infeksioneve të reja në Australi për herë të parë në pesë ditët e fundit është nën 100,000 dhe zyrtarët besojnë se vala nga lloji Omikron po i afrohet kulmit në Uellsin e Ri Jugor, vendi më i prekur në kontinent.

Autoritetet australiane kanë regjistruar gjithsej 85,824 raste në 24 orët e fundit, një rënie e konsiderueshme nga një rekord prej më shumë se 150,000 të enjten, pas së cilës numri i infeksioneve të reja filloi të bjerë.

Irani ka regjistruar tre vdekjet e para të konfirmuara të llojit Omicron, kumtoi dje ministria e shëndetësisë.

Deri më sot, më shumë se 60 për qind e afro 84 milionë iranianëve janë vaksinuar dyfish dhe po aplikohen edhe dozat përforcuese.

Në Slloveni janë konfirmuar 6012 infeksione të reja me koronavirus në 24 orët e mëparshme, që është përqindja më e lartë e testeve pozitive deri më tani.

Nga 10,299 teste PCR, ishin 6,012 rezultate pozitive ose 58,4 për qind, ndërsa numri i të infektuarve të rinj është pothuajse dyfishi i shtatë ditëve më parë, kur ishin 3,360, sipas Institutit Kombëtar të Shëndetit Publik.

Qendra Kombëtare Kërkimore për Epidemiologjinë dhe Mikrobiologjinë “Gamaleja” e Rusisë po shqyrton zhvillimin e vaksinave polivalente kundër llojeve të reja të infeksioneve të koronavirusit bazuar në variante të ndryshme si delta dhe omikron, deklaroi zëvendësdrejtori Denis Logunov.

“Është e mundur të zhvillohet një vaksinë e tillë komplekse kundër koronavirusit,” tha Logunov në një intervistë me “Rusia-1”.