Connect with us

Lajme

Shefi i diplomacisë greke Nikos Dendias sot në Shkup

Published

on

 

Ministri i Punëve të Jashtme të Greqisë, Nikos Dendias sot do të qëndrojë për vizitë zyrtare në Republikën e Maqedonisë së Veriut, në suaza të të cilës do të mbajë takim me nikoqirin e tij shefin e Diplomacisë Nikolla Dimitrov.

Siç kumtoi MPJ, në takim është parashikuar të bisedohet për marrëdhëniet bilaterale, për bashkëpunimin politik dhe ekonomik, si dhe për perspektivën evropiane të vendit tonë dhe rajonit.

Gjithashtu, shtohet, është parashikuar të shqyrtohen edhe mundësitë për përparim të dialogut politik mes dy vendeve,  në dritë të implementimit të obligimeve nga Marrëveshja e Prespës.

Dendias në deklaratë ekskluzive për MIA-n në vigjilje të  vizitës së tij të nesërme të parë në Shkup shprehu  mbështetje të fuqishme për perspektivën evropiane të Maqedonisë së Veriut. Ai zbulon se Greqia punon  në ndërmarrjen e  nismave konkrete, me qëllim që BE-ja të japë dritë të gjelbërt për vendin tonë, ndërsa me ç’rast shpreh edhe  mbështetje të fuqishme për  perspektivën evropiane dhe të tërë Ballkanit Perëndimor, politikë e cila, siç thotë,  përmes agjendës së Selanikut, Athinën e ka vendosur në prioritetet e Bashkimit Evropian.

“Mbështetja jonë për fillim të negociatave inkuadruese të Maqedonisë së Veriut me Unionin është dhënë. Punojmë në atë dhe ndërmarrim  nisma konkrete, në konsultim me të gjithë partnerët tanë në BE, me qëllim sa më shpejtë që është e mundur, në atë drejtim të sillet  vendim pozitiv në Union. Gjithsesi ajo që nënkuptohet është se nga ana e Republikës të Maqedonisë së Veriut, nuk duhet të zvogëlohet intensiteti i përpjekjeve për harmonizim me standardet evropiane. Njejtë sikur që nënkuptohet edhe se nga ana e Greqisë, do të ketë mbështetës të fuqishëm në këtë përpjekje të saj”, porosit Dendias.

Për vizitën e sotme në Shkup ai thotë se vjen në “vendin fqinj dhe së shpejti aleat  i Greqisë në NATO” dhe në vendin i cili pret “të bëhet edhe partner i Greqisë në Bashkimin Evropian në një të ardhme jo aq të largët”.

“Shpresoj në takime konstruktive gjatë vizitës sime,  që do të sjellin rezultate në interes të shteteve fqinje,  rezultate të dukshme edhe për qytetarët tanë. Me homlogun tim,  ministrin e Punëve të Jashtme, me zotëri Dimitrovin tashmë jemi takuar disa herë kohëve të fundit dhe kemi marrëdhënie të sinqertë, sjellje të respektimit të ndërsjellë, të sinqeritetit  dhe të natyrshmërisë dhe mirëkuptimit të ndërsjellë. Marrëdhëniet tona bilaterale janë jashtëzakonisht të rëndësishme edhe për të dy vendet tona. Punojmë për përforcimin e tyre thelbësor dhe thellimin në spektrin më të gjerë të fushave”, thotë Dendias për MIA-n.

Në lidhje me Marrëveshjen e Prespës, shefi i diplomacisë greke porosit se ajo është obligative për të dy vendet dhe shton se  zbatimi i tij i tërësishëm do të thotë edhe nxitje shtesë për zhvillim më të madh dhe prosperitet të të dy popujve.

Në suaza të vizitës zyrtare  në Republikën e Maqedonisë së Veriut, ministri grek i Punëve të Jashtme do të takohet edhe me presidentin Stevo Pendarovski dhe me kryeministrin Zoran Zaev. 

Continue Reading

Lajme

Gjukanoviq mbështet nismën e Abazoviqit për ndryshimin e Qeverisë

Published

on

Kryesia e Partisë Demokratike të Socialistëve (DPS), të presidentit të Malit të Zi, Millo Gjukanoviq, ka njoftuar se do të mbështesë çdo nismë që do të çojë në largimin e Qeverisë aktuale të shtetit.

“DPS-ja mirëpret gatishmërinë e një pjese të shumicës parlamentare për të propozuar zgjidhje me përfaqësues të disa partive të pakicave, që do të çonin në zhbllokimin e institucioneve dhe përshpejtimin e procesit të bisedimeve me Bashkimin Evropian”, tha partia e presidentit të Malit të Zi.

Kështu u përgjigj DPS-ja ndaj nismës për të formuar një qeveri të pakicës, si një model për tejkalimin e krizës politike në Mal të Zi. Këtë propozim e ka prezantuar Lëvizja Qytetare Ura, që është në pushtet, dhe Lidhja e Qytetarëve CIVIS.

Këto dy subjekte, në zgjedhjet parlamentare të vitit 2020 kishin garuar në kuadër të listës “E zeza mbi të bardhë”. Në ato zgjedhje, DPS-ja u rrëzua nga pushteti pas tre dekadash.

Gjatë prezantimit të propozimit për qeveri të pakicës, Lëvizja Qytetare Ura dhe Lidhja e Qytetarëve CIVIS thanë më 17 janar se në një qeveri të tillë nuk do të kishte vend për partinë më të madhe opozitare, Partinë Demokratike të Socialistëve (DPS) dhe partinë më të fortë të koalicionit aktual, Frontit Demokratik (DF), parti pro-serbe.

Zëvendëskryeministri i Malit të Zi dhe lideri i Lëvizjes Ura, Dritan Abazoviq ka thënë se ky model është një zgjidhje e mundshme, por të cilën nuk do t’ia imponojnë askujt.

“Është koha që të zhbllokohet rruga për në Bashkimin Evropian. Nëse kjo situatë nuk mund të zgjidhet, zgjedhjet mbeten zgjidhje e qartë”, tha Abazoviq më 17 janar.

Për të iniciuar shkarkimin e Qeverisë në Kuvend nevojiten 27 vota, ndërsa për largimin e saj duhet një shumicë prej 41 deputetësh.

Me mbështetjen e DPS-së, e cila ka 30 deputetë në Parlamentin malazez, Lëvizja Ura siguron numrin e mjaftueshëm të votave për një mocion mosbesimi ndaj Qeverisë së kryeministrit Zdravko Krivokapiq.

Kryeministri i Malit të Zi, Zdravko Krivokapiq kundërshtoi ashpër paralajmërimin për formimin e një qeverie të pakicës, duke e cilësuar si “mashtrim” këtë nismë.

Qeveria e Krivokapiqit, e cila ka një votë më shumë se sa duhet në Parlament, ka humbur mbështetjen e shumicës qeverisëse, kryesisht të partisë pro-serbe, Frontit Demokratik.

Megjithatë, Fronti Demokratik nuk ka nisur asnjëherë një nismë formale për të shkarkuar Qeverinë, e cila nuk ka pasur mbështetjen e kësaj partie që nga mesi i vitit të kaluar.

Ndër të tjera, DF-ja nuk është pajtuar me miratimin e Rezolutës për Srebrenicën në Parlamentin e Malit të Zi, si dhe me shkarkimin e ministrit Vlladimir Lleposaviq për shkak të mohimit të gjenocidit në Srebrenicë.

Qeveria e Zdravko Krivokapiqit u zgjodh më 4 dhjetor 2020 me votat e Frontit Demokratik, Demokratëve dhe Lëvizjes Qytetare Ura si qeveria e ekspertëve, kurse i vetëm politikan në të është kreu i Lëvizjes Ura, Dritan Abazoviq, që mban postin e zëvendëskryeministrit.

Që nga formimi i kësaj qeverie, ajo ka qenë cak i kritikave dhe pengesave që vijnë nga strukturat e shumicës qeverisëse, në radhë të parë nga Fronti Demokratik, që vazhdimisht ka kërkuar, por asnjëherë nuk i ka zyrtarizuar kërkesën për zgjedhjen e një qeverie të re.

Fronti Demokratik është deklaruar për mundësinë e krijimit të qeverisë së pakicës, duke thënë se “nuk janë për rrëzimin e Qeverisë aktuale, por për zgjedhjen e një të reje”. Sipas kësaj partie, ata duan një ekzekutiv që do të pasqyronte vullnetin elektoral të qytetarëve, që e kanë shprehur në zgjedhjet e gushtit të vitit 2020.

Kurse partitë e komuniteteve e mbështesin propozimin e Lëvizjes Ura, duke e cilësuar si mundësi reale dhe optimale për të dalë nga kriza aktuale politike, u tha në një deklaratë të përbashkët të lëshuar nga liderët e Partisë Boshnjake, Listës Shqiptare dhe Koalicionit Shqiptar.

Continue Reading

Lajme

Nesër ditë jopune për qytetarët e besimit ortodoks

Published

on

Sipas Ligjit për festat e Republikës së Maqedonisë të Veriut (“Gazeta zyrtare e RMV” nr. 21/98 dhe 18/07), 19 janar i viti 2022 (e mërkurë), Epifania ( Uji i Bekuar), është ditë jopune për qytetarët e besimit ortodoks në Republikën e Maqedonisë së Veriut, kumtoi Ministria e Punës dhe Politikës Sociale.

Nga MPPS-ja uron qytetarët e besimit ortodoks për festën e Epifanisë (Dita e Ujit të Bekuar).

Continue Reading

Kosovë

Dëshmitari Sopi: Forcat serbe nuk i kursyen as fëmijët, gratë e pleqtë (Video)

Published

on

Kryetari i Organizatës së Veteranëve të Luftës së UÇK-së në Prishtinë, Fatmir Sopi, ka qenë dëshmitari i 11-të me radhë, i cili ka dëshmuar në gjykimin ndaj Salih Mustafës.

Sopi në Hagë ka rrëfyer për ofensivën e 7 dhe 18 prillit, derisa ka shpalosur detaje nga ato që kanë ndodhur në fshatrat e Gollakut.

“Forcat serbe kanë granatuar me mjetet dhe teknologjinë që kanë poseduar nga të gjitha drejtimet, duke mos kursyer as civilët dhe as fëmijët, gratë dhe pleqtë, gjatë kësaj ofenzivive kanë ndodhur ngjarje të tmerrshme ku familje të tëra apo njerëz që kanë qenë në shtëpitë e tyre janë granatuar dhe janë djegur për së gjalli”, tha Sopi.

Ish-pjesëtari i UÇK-së ka folur edhe për njësinë BIA, të cilin e ka udhëhequr Salih Mustafa.

“Rolin më specifik të njësitit BIA më së miri e shpjegon vet përfaqësuesi i njësitit BIA, ndërsa unë sa kam mujt me kuptu ka qenë pjesë e Ushtrisë Çlirimtare të Kosovës sikur të gjitha njësitet e tjera në Zonën Operative të Llapit, Rolin e çdo ushtari dhe çdo njësi unë nuk mund ta di por e di se kanë punuar në bazë të urdhrave dhe në bazë të rrethanave të kohës që të japin kontributin e tyre të çmuar për çlirimin e vendit”, tha Sopi.

Dëshmitari Sopi ka thënë se zyrtarizimi i Brigadës 153, pjesë e së cilës ka qenë edhe ai, është bërë në shtëpinë e tij.

Është pyetur për shkollën në Zllash e për të cilën ka thënë se aty nuk ka qenë i vendosur shtabi i brigadës.

“Ndërtesa e shkollës ka shërbyer si qendër stërvitore mirëpo shtabi i brigadës e ka pasur aty komandantin e qendrës stërvitore e shumë kush e ka identifikuar se ajo ka shërbyer si shtab, por ka qenë një zyre e komandantit të stërvitjeve, e përgjegjësive që kanë qenë për stërvitje të cilët kanë pasur zyre dhe ka qenë kuzhina për ushtarët të cilët kanë qenë në stërvitje ndërsa në atë kuptimin me qenë i stacionuar shtabi për kohë të gjatë në shkollë nuk ka qenë i stacionuar, përkohësisht ne kemi qarkulluar andej”, tregoi Sopi.

Gjykimi i Salih Mustafës është i pari në Dhomat e Specializuara të Kosovës, derisa para Fatmir Sopit në këtë proces kanë dëshmuar edhe 10 dëshmitarë të tjerë.

Mustafa është i arrestuari i parë nga Specialja pas konfirmimit të aktakuzës ndaj tij e sipas së cilit akuzohet për krime lufte.

VIDEO

Continue Reading

Aktuale