Connect with us

Lajme

Gjyqësia / Lëndët u vjetërsohen, por kërkojnë paga më të larta

Published

on

Gjyqësia e zëshme për pagat, hesht për joefikasitetin dhe vjetërsimin e lëndëve

Protesta e administratës gjyqësore përsëri i hapi çështjet për funksionimin dhe efikasitetin e gjyqësisë së Maqedonisë. Kërkesat e tyre morën mbështetje prej gjykatësve për çka Ministrja e Drejtësisë, Renata Deskoska, u tha se siç janë të zëshëm në mbështetjen ashtu duhet të reagojnë edhe për lëndët e vjetërsuara dhe krimin nga radhët e tyre.

“Është për të ardhur keq që nuk dëgjuam qëndrim nga fusha e gjyqësisë për çështjet për shkak të të cilave gjyqësia është me besimin më të ulët mes qytetarëve. Pritëm reagim edhe nga gjyqtarët edhe nga kryetarët e gjykatave edhe nga administrata gjyqësore për rastet për vjetërsim të përndjekjes së disa procedurave gjyqësore për të cilin shkak krimi mbetet i padënuar. Presim reagim edhe nga gjykatat edhe nga administrata gjyqësore për dyshime të caktuara për veprime kriminele në radhët e tyre, për të cilat nuk pamë përndjekje penale dhe procedura penale. Për shembull, video klipi, të cilin e pa gjithë opinioni dhe e ndau në rrjetet sociale, në të cilat tregtohet me lëndët gjyqësore nga ana e një të punësuari në administratën gjyqësore”, deklaroi dje Deskoska.

Ajo i bëri thirrje Komisionit Shtetëror për Parandalim të Korrupsionit të fillojë procedurë serioze për verifikimin e listave anketuese të gjykatësve dhe në këtë mënyrë të shfrytëzohen mundësitë ekzistuese ligjore për veting në gjyqësor, por paralajmëroi edhe biseda serioze me Bashkimin Evropian për veting të plotë në gjyqësi.

“Nevojiten procedura me të cilat gjyqësia do të kthehet në listën e institucioneve me besim. Për fat të keq, zërin nga radhët e gjyqësisë e dëgjojmë vetëm atëherë kur bëhet fjalë për shpërndarje të rrogave. Gjyqësia më së paku legjitimitet të flasë në këtë temë duke e pasur parasysh çka është bërë me alokimin e mjeteve në kuadër të gjyqësisë dhe duke i pasur parasysh rezultatet nga puna e tyre”, theksoi Deskoska.

Mbështetje publike administratës gjyqësore i dha Kolegjiumi i gjykatësve dhe Shoqata e gjykatësve nga Gjykata Themelore në Shkup.

“Këtu jemi së bashku me administratën gjyqësore të Gjykatës Penale Shkup për të dhënë mbështetje për nëpunësit gjyqësorë. Ne mendojmë se ata meritojnë paga më të larta dhe të ardhura. Bëhet fjalë për nëpunësit më të vlefshëm të vendit në përgjithësi së bashku me punonjësit e shëndetësisë dhe arsimit dhe në këtë kuptim unë mendoj se edhe nëpunësit gjyqësorë duhet të kenë, për arsye të ndryshme, të ardhura më të larta. Ata me të vërtetë kanë një punë stresuese, kanë shumë punë dhe un nuk shoh përse mos t’i mbështesim. Un nuk shoh ndonjë problem as në  Këshillin e buxhetit gjyqësor dhe ne gjykatësit edhe këshilli i mbështesim nëpunësit gjyqësorë në kërkesat e tyre. Është e qartë se pagat janë rritur në të kaluarën dhe kjo tendencë duhet të vazhdojë”, deklaroi gjykatësi, Ivan Xholev, kryetar i Gjykatës Penale.

Sipas Deskoskës, Xholev në vend se të japë mbështetje, duhet të reagojë për veprat e vjetruara në gjykatën e tij.

“Pres sinqerisht që kryetari i Gjykatës Penale në Shkup të dalë me protestë, ndikim mbi kolegët e tij se pse disa gjykime nuk caktohen pas tre muajve, pse vjetrohen lëndët në gjykatën e tij. Këto janë dilema dhe pyetje të cilat i parashtron opinioni dhe për të cilat pret përgjigje. Këto janë pyetjet të cilat i interesojnë opinionit. Përndryshe është shumë lehtë të protestoni dhe t’i jepni mbështetje dikujt që proteston”, tha Deskoska, duke u përgjigjur në pyetjen e gazetarëve pas konferencës për shtyp të thirrur pas protestës të sotme të administratës gjyqësore.

Zëshmërinë në kuadër të gjyqësorit, siç vlerësoi, duhet ta dëgjojmë për rastet siç është arratisja e Igor Spasov, të cilat i minojnë themelet e gjyqësorit dhe të gjithë sistemit juridik.

“Nuk mund të dëgjojmë ngritje të zërit për atë se si ata do t’i ndajnë paratë brenda, por vetë duhet të jenë të vetëdijshëm për përgjegjësinë e tyre. A bëhet fjalë për gjykatës, kush i ka lëshuar, nuk e ka lëshuar Administrata ose dikush nga jashtë Ministrisë, e lëshon gjykatësi në procedurë gjyqësore”, tha ajo.

Për shkak të vjetrimit të veprës ish-kryeministri Nikolla Gruevski, i cili është në arrati në Hungari, të mërkurën u lirua nga përndjekja penale për lëndën “Trajektorja” në të cilën u akuza për “pranimin e çmimit për ndikimin e paligjshëm” gjatë ndërtimit të autostradave Shtip – Milladinovc dhe Kërçovë – Ohër. Këshilli gjyqësor, me kërkesë të avokatit me detyrë zyrtare, i cili ishte caktuar për Gruevskin, ka konstatuar vjetrim të rastit për shkak të skadimit të gjashtë viteve prej veprës së kryer ndërsa pas aktgjykim të plotfuqishëm. 

Continue Reading

Lajme

Gjukanoviq mbështet nismën e Abazoviqit për ndryshimin e Qeverisë

Published

on

Kryesia e Partisë Demokratike të Socialistëve (DPS), të presidentit të Malit të Zi, Millo Gjukanoviq, ka njoftuar se do të mbështesë çdo nismë që do të çojë në largimin e Qeverisë aktuale të shtetit.

“DPS-ja mirëpret gatishmërinë e një pjese të shumicës parlamentare për të propozuar zgjidhje me përfaqësues të disa partive të pakicave, që do të çonin në zhbllokimin e institucioneve dhe përshpejtimin e procesit të bisedimeve me Bashkimin Evropian”, tha partia e presidentit të Malit të Zi.

Kështu u përgjigj DPS-ja ndaj nismës për të formuar një qeveri të pakicës, si një model për tejkalimin e krizës politike në Mal të Zi. Këtë propozim e ka prezantuar Lëvizja Qytetare Ura, që është në pushtet, dhe Lidhja e Qytetarëve CIVIS.

Këto dy subjekte, në zgjedhjet parlamentare të vitit 2020 kishin garuar në kuadër të listës “E zeza mbi të bardhë”. Në ato zgjedhje, DPS-ja u rrëzua nga pushteti pas tre dekadash.

Gjatë prezantimit të propozimit për qeveri të pakicës, Lëvizja Qytetare Ura dhe Lidhja e Qytetarëve CIVIS thanë më 17 janar se në një qeveri të tillë nuk do të kishte vend për partinë më të madhe opozitare, Partinë Demokratike të Socialistëve (DPS) dhe partinë më të fortë të koalicionit aktual, Frontit Demokratik (DF), parti pro-serbe.

Zëvendëskryeministri i Malit të Zi dhe lideri i Lëvizjes Ura, Dritan Abazoviq ka thënë se ky model është një zgjidhje e mundshme, por të cilën nuk do t’ia imponojnë askujt.

“Është koha që të zhbllokohet rruga për në Bashkimin Evropian. Nëse kjo situatë nuk mund të zgjidhet, zgjedhjet mbeten zgjidhje e qartë”, tha Abazoviq më 17 janar.

Për të iniciuar shkarkimin e Qeverisë në Kuvend nevojiten 27 vota, ndërsa për largimin e saj duhet një shumicë prej 41 deputetësh.

Me mbështetjen e DPS-së, e cila ka 30 deputetë në Parlamentin malazez, Lëvizja Ura siguron numrin e mjaftueshëm të votave për një mocion mosbesimi ndaj Qeverisë së kryeministrit Zdravko Krivokapiq.

Kryeministri i Malit të Zi, Zdravko Krivokapiq kundërshtoi ashpër paralajmërimin për formimin e një qeverie të pakicës, duke e cilësuar si “mashtrim” këtë nismë.

Qeveria e Krivokapiqit, e cila ka një votë më shumë se sa duhet në Parlament, ka humbur mbështetjen e shumicës qeverisëse, kryesisht të partisë pro-serbe, Frontit Demokratik.

Megjithatë, Fronti Demokratik nuk ka nisur asnjëherë një nismë formale për të shkarkuar Qeverinë, e cila nuk ka pasur mbështetjen e kësaj partie që nga mesi i vitit të kaluar.

Ndër të tjera, DF-ja nuk është pajtuar me miratimin e Rezolutës për Srebrenicën në Parlamentin e Malit të Zi, si dhe me shkarkimin e ministrit Vlladimir Lleposaviq për shkak të mohimit të gjenocidit në Srebrenicë.

Qeveria e Zdravko Krivokapiqit u zgjodh më 4 dhjetor 2020 me votat e Frontit Demokratik, Demokratëve dhe Lëvizjes Qytetare Ura si qeveria e ekspertëve, kurse i vetëm politikan në të është kreu i Lëvizjes Ura, Dritan Abazoviq, që mban postin e zëvendëskryeministrit.

Që nga formimi i kësaj qeverie, ajo ka qenë cak i kritikave dhe pengesave që vijnë nga strukturat e shumicës qeverisëse, në radhë të parë nga Fronti Demokratik, që vazhdimisht ka kërkuar, por asnjëherë nuk i ka zyrtarizuar kërkesën për zgjedhjen e një qeverie të re.

Fronti Demokratik është deklaruar për mundësinë e krijimit të qeverisë së pakicës, duke thënë se “nuk janë për rrëzimin e Qeverisë aktuale, por për zgjedhjen e një të reje”. Sipas kësaj partie, ata duan një ekzekutiv që do të pasqyronte vullnetin elektoral të qytetarëve, që e kanë shprehur në zgjedhjet e gushtit të vitit 2020.

Kurse partitë e komuniteteve e mbështesin propozimin e Lëvizjes Ura, duke e cilësuar si mundësi reale dhe optimale për të dalë nga kriza aktuale politike, u tha në një deklaratë të përbashkët të lëshuar nga liderët e Partisë Boshnjake, Listës Shqiptare dhe Koalicionit Shqiptar.

Continue Reading

Lajme

Nesër ditë jopune për qytetarët e besimit ortodoks

Published

on

Sipas Ligjit për festat e Republikës së Maqedonisë të Veriut (“Gazeta zyrtare e RMV” nr. 21/98 dhe 18/07), 19 janar i viti 2022 (e mërkurë), Epifania ( Uji i Bekuar), është ditë jopune për qytetarët e besimit ortodoks në Republikën e Maqedonisë së Veriut, kumtoi Ministria e Punës dhe Politikës Sociale.

Nga MPPS-ja uron qytetarët e besimit ortodoks për festën e Epifanisë (Dita e Ujit të Bekuar).

Continue Reading

Kosovë

Dëshmitari Sopi: Forcat serbe nuk i kursyen as fëmijët, gratë e pleqtë (Video)

Published

on

Kryetari i Organizatës së Veteranëve të Luftës së UÇK-së në Prishtinë, Fatmir Sopi, ka qenë dëshmitari i 11-të me radhë, i cili ka dëshmuar në gjykimin ndaj Salih Mustafës.

Sopi në Hagë ka rrëfyer për ofensivën e 7 dhe 18 prillit, derisa ka shpalosur detaje nga ato që kanë ndodhur në fshatrat e Gollakut.

“Forcat serbe kanë granatuar me mjetet dhe teknologjinë që kanë poseduar nga të gjitha drejtimet, duke mos kursyer as civilët dhe as fëmijët, gratë dhe pleqtë, gjatë kësaj ofenzivive kanë ndodhur ngjarje të tmerrshme ku familje të tëra apo njerëz që kanë qenë në shtëpitë e tyre janë granatuar dhe janë djegur për së gjalli”, tha Sopi.

Ish-pjesëtari i UÇK-së ka folur edhe për njësinë BIA, të cilin e ka udhëhequr Salih Mustafa.

“Rolin më specifik të njësitit BIA më së miri e shpjegon vet përfaqësuesi i njësitit BIA, ndërsa unë sa kam mujt me kuptu ka qenë pjesë e Ushtrisë Çlirimtare të Kosovës sikur të gjitha njësitet e tjera në Zonën Operative të Llapit, Rolin e çdo ushtari dhe çdo njësi unë nuk mund ta di por e di se kanë punuar në bazë të urdhrave dhe në bazë të rrethanave të kohës që të japin kontributin e tyre të çmuar për çlirimin e vendit”, tha Sopi.

Dëshmitari Sopi ka thënë se zyrtarizimi i Brigadës 153, pjesë e së cilës ka qenë edhe ai, është bërë në shtëpinë e tij.

Është pyetur për shkollën në Zllash e për të cilën ka thënë se aty nuk ka qenë i vendosur shtabi i brigadës.

“Ndërtesa e shkollës ka shërbyer si qendër stërvitore mirëpo shtabi i brigadës e ka pasur aty komandantin e qendrës stërvitore e shumë kush e ka identifikuar se ajo ka shërbyer si shtab, por ka qenë një zyre e komandantit të stërvitjeve, e përgjegjësive që kanë qenë për stërvitje të cilët kanë pasur zyre dhe ka qenë kuzhina për ushtarët të cilët kanë qenë në stërvitje ndërsa në atë kuptimin me qenë i stacionuar shtabi për kohë të gjatë në shkollë nuk ka qenë i stacionuar, përkohësisht ne kemi qarkulluar andej”, tregoi Sopi.

Gjykimi i Salih Mustafës është i pari në Dhomat e Specializuara të Kosovës, derisa para Fatmir Sopit në këtë proces kanë dëshmuar edhe 10 dëshmitarë të tjerë.

Mustafa është i arrestuari i parë nga Specialja pas konfirmimit të aktakuzës ndaj tij e sipas së cilit akuzohet për krime lufte.

VIDEO

Continue Reading

Aktuale