Connect with us

Lajme

Dimitrov me porosi : Politika e jashtme të mos jetë temë e përplasjeve ndërpartiake

Published

on

Seanca e sotme e Komisionit parlamentar për punë të jashtme ishte mjaftë e tensionuar dhe me ndërhyrje të shpeshta. Arsye për këtë gjendje ishte debati për raportin e ministrit të Punëve të Jashtme, Nikolla Dimitrov, për realizimin e politikës së jashtme dhe proceseve eurointegruese.  Në fjalimin e tij, ministri Dimitrov dha një përshkrim të shkurtë për procesin e deritanishëm eurointegrues të Maqedonisë së Veriut.

“Duhet të gjejmë mënyra që politika e jashtme mos të vijë në nivel të përplasjeve brenda partiake. Humbëm gjenerata rreth BE-së dhe NATO-s, prej këtu me Marrëveshjen e Prespës tentojmë të vendosim mekanizma të lidhur me anëtarësimin tonë në NATO dhe hapjen e procesit për aderim. Kjo nënkupton se ndryshimi i dokumenteve për përdorim të brendshëm drejtpërdrejtë do të varet nga hapja e kapitujve”, tha Dimitrov.

Ai mes tjerash përkujtoi se në vitin 2001 kur është nënshkruar Marrëveshja për stabilizim dhe asociim me BE-në, ne si shtet kemi qenë në një grup me Kroacinë dhe mundësitë më të mira të shtetit për hapjen e negociatave kanë qenë viti 2012-të. Sipas tij, nga ajo kohë e deri tani në BE nuk ka vullnet të njëjtë për zgjerim, për shkak se të njëjtit kanë qenë të angazhuar me shumë çështje siç është kriza me imigrantët, Bregziti dhe sundimi i ligjit në shumë shtete.

“Tash jemi me Shqipërinë, e cila në vitin 2014 u bë kandidat për anëtarësim me dy rekomandime. Ne jemi me dhjetë rekomandime. Kjo krijojë sfidë shtesë. Vetë Makroni, krahas udhëzimeve se fillimisht duhet ta rregullojnë shtëpinë e tyre, thotë se vlerësim i tyre është se do të jetë gabim nëse ndaras i trajtojnë kandidaturat e Maqedonisë dhe Shqipërisë. Unë edhe mbrëmë thash se edhe pse kemi interes që të gjithë fqinjët tanë të ecin përpara, kjo është jokonsistente me fokusin e avancimit të metodologjisë për procesit e aderimit, për arsye se ai thotë se çdo shtet duhet të vlerësohet sipas meritave të veta”, tha Dimitrov.

Pas këtij fjalimi të Dimitrovit, deputeti i BDI-së, Artan Grubi kërkoi pauzë, të cilën kryetari i Komisionit për punë të jashtme, Antonio Milloshoski e vlerësoi si taktikë të menduar nga LSDM dhe BDI, që ministri mos t’i jep llogari opozitës dhe mos të jetë i përballuar me kritika. Ai po ashtu tha se për dështimin në Bruskel, përgjegjësi kanë zëvendës kryeministri për çështje evropiane, Bujar Osmani, ministri Dimitrov dhe kryeministri, Zoran Zaev. Fërkimet mes anëtarëve të këtij Komisioni vazhduan pasi që kryetari Milloshoski nuk dha pauzë, gjegjësisht me fjalimin e tij vazhdoi deputeti Ilija Dimovski, i cili për mosmarrjen e datës për hapjen e negociatave dhe për Marrëveshjen e Prespës, tha se investimi është bërë, ndërsa rezultati nuk është fituar.

“Ju në tavolinë i vendosët interesat kombëtare dhe nuk fituat asgjë. Përgjigja e juaj si Qeveri duhej të ishte pranimi i përgjegjësisë, dhe jo kërkesa për fajtorët. Thoni se Marrëveshja e Prespës na jep mundësi që mos ta zbatojmë emrin e ri në sferat ku nuk kemi hapur kapituj, për shembull në arsim – por atje vetëm se janë bërë ndryshimet, ju i ndërruat dëftesat”, i replikoi Dimovski, ministrit Dimitrov.

Ndërkohë, ai e akuzoi ministrin e Punëve të Jashtme, Dimitrov se Marrëveshja e Prespës është shkelur në dëm të vendit dhe se Qeveria ka zbatuar diçka të cilët nuk është dashur, duke vlerësuar se Marrëveshja e Prespës jo se nuk është zbatuar, por ajo tej zbatuar. oxh

Continue Reading

Lajme

Gjukanoviq mbështet nismën e Abazoviqit për ndryshimin e Qeverisë

Published

on

Kryesia e Partisë Demokratike të Socialistëve (DPS), të presidentit të Malit të Zi, Millo Gjukanoviq, ka njoftuar se do të mbështesë çdo nismë që do të çojë në largimin e Qeverisë aktuale të shtetit.

“DPS-ja mirëpret gatishmërinë e një pjese të shumicës parlamentare për të propozuar zgjidhje me përfaqësues të disa partive të pakicave, që do të çonin në zhbllokimin e institucioneve dhe përshpejtimin e procesit të bisedimeve me Bashkimin Evropian”, tha partia e presidentit të Malit të Zi.

Kështu u përgjigj DPS-ja ndaj nismës për të formuar një qeveri të pakicës, si një model për tejkalimin e krizës politike në Mal të Zi. Këtë propozim e ka prezantuar Lëvizja Qytetare Ura, që është në pushtet, dhe Lidhja e Qytetarëve CIVIS.

Këto dy subjekte, në zgjedhjet parlamentare të vitit 2020 kishin garuar në kuadër të listës “E zeza mbi të bardhë”. Në ato zgjedhje, DPS-ja u rrëzua nga pushteti pas tre dekadash.

Gjatë prezantimit të propozimit për qeveri të pakicës, Lëvizja Qytetare Ura dhe Lidhja e Qytetarëve CIVIS thanë më 17 janar se në një qeveri të tillë nuk do të kishte vend për partinë më të madhe opozitare, Partinë Demokratike të Socialistëve (DPS) dhe partinë më të fortë të koalicionit aktual, Frontit Demokratik (DF), parti pro-serbe.

Zëvendëskryeministri i Malit të Zi dhe lideri i Lëvizjes Ura, Dritan Abazoviq ka thënë se ky model është një zgjidhje e mundshme, por të cilën nuk do t’ia imponojnë askujt.

“Është koha që të zhbllokohet rruga për në Bashkimin Evropian. Nëse kjo situatë nuk mund të zgjidhet, zgjedhjet mbeten zgjidhje e qartë”, tha Abazoviq më 17 janar.

Për të iniciuar shkarkimin e Qeverisë në Kuvend nevojiten 27 vota, ndërsa për largimin e saj duhet një shumicë prej 41 deputetësh.

Me mbështetjen e DPS-së, e cila ka 30 deputetë në Parlamentin malazez, Lëvizja Ura siguron numrin e mjaftueshëm të votave për një mocion mosbesimi ndaj Qeverisë së kryeministrit Zdravko Krivokapiq.

Kryeministri i Malit të Zi, Zdravko Krivokapiq kundërshtoi ashpër paralajmërimin për formimin e një qeverie të pakicës, duke e cilësuar si “mashtrim” këtë nismë.

Qeveria e Krivokapiqit, e cila ka një votë më shumë se sa duhet në Parlament, ka humbur mbështetjen e shumicës qeverisëse, kryesisht të partisë pro-serbe, Frontit Demokratik.

Megjithatë, Fronti Demokratik nuk ka nisur asnjëherë një nismë formale për të shkarkuar Qeverinë, e cila nuk ka pasur mbështetjen e kësaj partie që nga mesi i vitit të kaluar.

Ndër të tjera, DF-ja nuk është pajtuar me miratimin e Rezolutës për Srebrenicën në Parlamentin e Malit të Zi, si dhe me shkarkimin e ministrit Vlladimir Lleposaviq për shkak të mohimit të gjenocidit në Srebrenicë.

Qeveria e Zdravko Krivokapiqit u zgjodh më 4 dhjetor 2020 me votat e Frontit Demokratik, Demokratëve dhe Lëvizjes Qytetare Ura si qeveria e ekspertëve, kurse i vetëm politikan në të është kreu i Lëvizjes Ura, Dritan Abazoviq, që mban postin e zëvendëskryeministrit.

Që nga formimi i kësaj qeverie, ajo ka qenë cak i kritikave dhe pengesave që vijnë nga strukturat e shumicës qeverisëse, në radhë të parë nga Fronti Demokratik, që vazhdimisht ka kërkuar, por asnjëherë nuk i ka zyrtarizuar kërkesën për zgjedhjen e një qeverie të re.

Fronti Demokratik është deklaruar për mundësinë e krijimit të qeverisë së pakicës, duke thënë se “nuk janë për rrëzimin e Qeverisë aktuale, por për zgjedhjen e një të reje”. Sipas kësaj partie, ata duan një ekzekutiv që do të pasqyronte vullnetin elektoral të qytetarëve, që e kanë shprehur në zgjedhjet e gushtit të vitit 2020.

Kurse partitë e komuniteteve e mbështesin propozimin e Lëvizjes Ura, duke e cilësuar si mundësi reale dhe optimale për të dalë nga kriza aktuale politike, u tha në një deklaratë të përbashkët të lëshuar nga liderët e Partisë Boshnjake, Listës Shqiptare dhe Koalicionit Shqiptar.

Continue Reading

Lajme

Nesër ditë jopune për qytetarët e besimit ortodoks

Published

on

Sipas Ligjit për festat e Republikës së Maqedonisë të Veriut (“Gazeta zyrtare e RMV” nr. 21/98 dhe 18/07), 19 janar i viti 2022 (e mërkurë), Epifania ( Uji i Bekuar), është ditë jopune për qytetarët e besimit ortodoks në Republikën e Maqedonisë së Veriut, kumtoi Ministria e Punës dhe Politikës Sociale.

Nga MPPS-ja uron qytetarët e besimit ortodoks për festën e Epifanisë (Dita e Ujit të Bekuar).

Continue Reading

Kosovë

Dëshmitari Sopi: Forcat serbe nuk i kursyen as fëmijët, gratë e pleqtë (Video)

Published

on

Kryetari i Organizatës së Veteranëve të Luftës së UÇK-së në Prishtinë, Fatmir Sopi, ka qenë dëshmitari i 11-të me radhë, i cili ka dëshmuar në gjykimin ndaj Salih Mustafës.

Sopi në Hagë ka rrëfyer për ofensivën e 7 dhe 18 prillit, derisa ka shpalosur detaje nga ato që kanë ndodhur në fshatrat e Gollakut.

“Forcat serbe kanë granatuar me mjetet dhe teknologjinë që kanë poseduar nga të gjitha drejtimet, duke mos kursyer as civilët dhe as fëmijët, gratë dhe pleqtë, gjatë kësaj ofenzivive kanë ndodhur ngjarje të tmerrshme ku familje të tëra apo njerëz që kanë qenë në shtëpitë e tyre janë granatuar dhe janë djegur për së gjalli”, tha Sopi.

Ish-pjesëtari i UÇK-së ka folur edhe për njësinë BIA, të cilin e ka udhëhequr Salih Mustafa.

“Rolin më specifik të njësitit BIA më së miri e shpjegon vet përfaqësuesi i njësitit BIA, ndërsa unë sa kam mujt me kuptu ka qenë pjesë e Ushtrisë Çlirimtare të Kosovës sikur të gjitha njësitet e tjera në Zonën Operative të Llapit, Rolin e çdo ushtari dhe çdo njësi unë nuk mund ta di por e di se kanë punuar në bazë të urdhrave dhe në bazë të rrethanave të kohës që të japin kontributin e tyre të çmuar për çlirimin e vendit”, tha Sopi.

Dëshmitari Sopi ka thënë se zyrtarizimi i Brigadës 153, pjesë e së cilës ka qenë edhe ai, është bërë në shtëpinë e tij.

Është pyetur për shkollën në Zllash e për të cilën ka thënë se aty nuk ka qenë i vendosur shtabi i brigadës.

“Ndërtesa e shkollës ka shërbyer si qendër stërvitore mirëpo shtabi i brigadës e ka pasur aty komandantin e qendrës stërvitore e shumë kush e ka identifikuar se ajo ka shërbyer si shtab, por ka qenë një zyre e komandantit të stërvitjeve, e përgjegjësive që kanë qenë për stërvitje të cilët kanë pasur zyre dhe ka qenë kuzhina për ushtarët të cilët kanë qenë në stërvitje ndërsa në atë kuptimin me qenë i stacionuar shtabi për kohë të gjatë në shkollë nuk ka qenë i stacionuar, përkohësisht ne kemi qarkulluar andej”, tregoi Sopi.

Gjykimi i Salih Mustafës është i pari në Dhomat e Specializuara të Kosovës, derisa para Fatmir Sopit në këtë proces kanë dëshmuar edhe 10 dëshmitarë të tjerë.

Mustafa është i arrestuari i parë nga Specialja pas konfirmimit të aktakuzës ndaj tij e sipas së cilit akuzohet për krime lufte.

VIDEO

Continue Reading

Aktuale