Në garën politike deri tani vazhdimisht kanë dalë subjekte të reja politike, të cilët konkurrojnë me programet e tyre politike për të tërhequr elektoratin.

Në fillim të pluralizmit politik ka funksionuar vetëm një parti politike shqiptare, Partia për Prosperitet Demokratik (PPD).

14 vite më vonë skena politike shqiptare pasurohet me dhjetëra parti të reja, shumica prej të cilëve kohë pas kohe kanë shuar aktivitetin e tyre politik.

Formimi i partive politike është shndërruar në një trend më të preferuar nga shumica e qytetarëve dhe grupacioneve të ndryshme, që synojnë ardhjen e tyre në pushtet, shkruan in7.

Por për të ardhur në pushtet duhet që të dukesh edhe në qendër të mediave, duke qenë sa më afër qytetarit, qoftë përmes deklaratave apo konferencave për shtyp, siç bëjnë partitë politike të bllokut maqedonas, të cilat në ditë kanë nga dy, tre apo më shumë paraqitje mediatike, kurse partitë e bllokut politik shqiptar janë strukur në selitë e tyre dhe heshtin.

Sipas njohësit të rrethanave politike shqiptare në Maqedoninë e Veriut, Arben Llalla, rezultat i këtij moskumunikimi dhe qytetarin shqiptar të përfaqësuesve politik është se partitë politike tani nuk kanë ideologji, por tek këta mbisundojnë vetëm interesat e ngushta individuale.

“Partitë politike shqiptare pas botimet e bombave nga Zaevi kur ishte në opozitë janë kthyer në shërbëtor të partive sllavomaqedonase sepse ndihen në presion nga LSDM dhe VMRO për botimin e ndonjë skandali të madh të tyre. Për mendimin tim përfundimisht përfundojë koha që partitë shqiptare kishin ideologji, tashmë mbizotëron interesi i ngushtë individualë që sapo vjen në postë i harron votuesit e tij sepse e ka mendjen për tu pasuruar në mënyrë korruptive. Më vjen keq të them se nuk duhet pretenduar tashmë për daljen në terren të politikanëve shqiptar për vota apo për të dëgjuar hallet e votuesve të tyre. Votat tek shqiptarët janë me të numëruar që para votimeve sepse kemi një emigracion të madh të cilët nuk rikthen për të jetuar e jo më për të votuar. Dihen votat,. Votojnë administratorët dhe pensionistët, kështu BDI do e kemi në pushtet edhe 10 vite të tjera, ndërsa partitë opozitare shqiptar do mjaftohen që lideri partiak të zgjidhet deputet, ndoshta edhe ndonjë person tjetër nga katundi i madh”, thotë për in7, Abren Llalla.

Ndërkaq për analistin politik, Bujar Plloshtani partitë politike shqiptare në Maqedoninë e Veriut heshtin karshi qytetarit dhe votuesit pasi nuk kanë oferta reale politike që si rezultat i kësaj ato edhe e kanë humbur besimin tek qytetarët dhe kjo ka reflektuar edhe brishtësinë e kumunikimit midis tyre.

“Partitë politike shqiptare nuk janë parti politike që dinë ta përçojnë interesin e përgjithshëm, por grupime interesi për ta marrë pushtetin. Detyra e parë e tyre ka qenë dhe vazhdon të jetë ndarja e kulaçit për përfitime personale. Partitë politike shqiptare janë egocentrike, të drejtuar më shumë kah vetja, se sa nga interesi i qytetarëve. Asnjë prej partive politike shqiptare nuk kanë vërtetuar deri tani se janë të angazhuar për mirëqenien kolektive, por veprimet politike në praktikë janë parë si ndarje të kulaçit për çështjet personale. Mendoj se problemi kryesor i partive politike shqiptare qëndron në mungesën reale të ofertave politike, dhe se politikat e deritanishme kanë bërë popullin të humb besimin te të gjitha autoritetet, siç ka ndodhur me shqiptarët, dhe kjo ka reflektuar edhe në brishtësinë e komunikimit në njërën anë mes partive, dhe qytetarëve në anën tjetër. Humbja e besimit e kthen popullin në përbuzje deri në atë shkallë, sa të të shmangë, duke të lënë të shesësh mjegull në mesin e militantëve partiak”, thotë për in7, Bujar Plloshtani.

Partitë politike janë një komponentë e rëndësishme e demokracisë. Me pjesëmarrje në zgjedhje, përmes punës së tyre në legjislaturë dhe ekzekutiv, si dhe me mobilizimin e qytetarëve rreth koncepteve të veçanta të politike, partitë u ofrojnë qytetarëve zgjedhje të rëndësishme për qeverisje, si dhe mundësi për pjesëmarrje politike për ndryshimin e së ardhmes të vendit të tyre.E gjitha kjo bëhet edhe me kumunikim në mes të partive dhe qytetarëve, kurse partitë politike shqiptare janë mbyllur hermetikisht dhe nuk kumunikojnë me qytetarin, kjo është si rezultat i frikës së krerëve të partive për dështimet e njëpasnjëshme, apo nga mungesa e aftësive për të nuhatur problematikat, kjo ende nuk është e qartë. Por sidoqoftë, luftën politike partitë politike shqiptare në Maqedoninë e Veriut ua lënë vetëm partive të bllokut maqedonas, gjë që u lë hapësirë që qytetarët shqiptar të ndjehen të papërfaqësuar./in7.tv/