Connect with us

Shëndeti

Redukto ankthin me shtatë hapa

Published

on

Çrregullimet e ankthit, janë grupi më i zakonshëm i çrregullimeve psikologjike. Rreth 19 për qind e popullsisë amerikane, vuan çdo vit nga një çrregullim ankthi, dhe 31për qind gjatë jetës së tyre. Këto shifra, janë edhe më të larta për gratë dhe adoleshentët e sotëm. Edhe në botë të dhënat janë shqetësuese.

Por, pse po shtohet ankthi tek njerëzit? Një nga shpjegimet e ekspertëve, është se njerëzit, po mësohen të shmangin gjithnjë e më shumë shqetësimet e çdo lloji, emocionet negative apo edhe dhimbjen. Dhe vështirësia me këtë qasje lind nga fakti se dhimbja, frika, trishtimi, dhe ndjenjat e tjera të pakëndshme janë të kudogjendura, ato janë pjesë e pashmangshme e përvojës normale njerëzore.

Dhe kur ne me vetëdije ose jo tentojnë t’i shmangim, të arratisemi prej tyre apo t’i minimizojmë këto emocione normale njerëzore, ata mund të zhduken për pak kohë, por gjithmonë rikthehen “për të marrë hak”. Por, situata nuk është e pashpresë. Ja cilat janë 7 hapat që mund të ndiqni për të zhdukur ankthin që ju rrethon.

Bëni nga një gjë ndryshe çdo ditë, pa ndonjë arsye speficike

Kjo është këshilla që jepte Uilliam Xhejms, një nga themeluesit e psikologjisë amerikane, në librin e tij të vitit 1890 “Zakoni”. Ajo është ende e zbatueshme edhe më shumë se 100 vjet më vonë. Një nga këto gjëra ndryshe, mund të jetë bërja dush me ujë më të ftohtë se zakonisht, parkimi i makinës paksa më tej hyrjes së dyqanit, në mënyrë që të detyrohesh të ecësh në shi, ose të tolerosh urinë për 15 minuta më shumë se sa zakonisht, para se të hash.

Lejojeni partnerin apo fëmijën tuaj, të bëjë diçka që zakonisht ju bën të mos ndiheni rehat. Ose hani vetëm në një restorant, apo shihni vetë një film në shtëpi

Përtej masave të përbashkëta të sigurisë, vini se re prirja juaj për të protestuar diskutuar apo ndaluar diçka, rrjedh nga ankthi dhe shqetësimi juaj. Prandaj, për disa orë lërini gjërat në rrjedhën e tyre spontane. Do të ndiheni jo vetëm më pak të shqetësuar në planin afatgjatë, por ndoshta do të përmirësoni marrëdhëniet tuaja, dhe të stimulojë qëndrueshmërinë tek fëmijët tuaj.

Mos shmangni lajmet mbi vdekjen

Një nga psikologët më të mëdhenj të të gjitha kohërave, Rollo May, ka folur shumë mbi ankthin ekzistencial, frikën nga vdekja me të cilën janë të detyruar të jetojnë të gjithë njerëzit. Ai theksoi se ajo që përcakton nëse do të prekemi apo ajo nga një ankth problematik, është mënyra si ne merremi me faktin se të gjithë një ditë do të pushojmë së ekzistuari (të paktën në të njëjtën formë si tani kur jemi gjallë).

Nëse ne “shkatërrohemi” psikologjikisht nën peshën e frikës nga vdekja, dhe paralizohemi nga ajo, ka të ngjarë që të zhvillojmë çrregullimet e ankthit. Nëse e pranojmë këtë frikë, dhe jemi të motivuar ta jetojmë çdo ditë si të ishte fundit, nuk do te kemi probleme.

Kujtoni veten se jemi në këtë Tokë për një kohë të kufizuar, ndaj nuk ka kohë për të humbur. Mos i shmangni funeralet, përmendoret, varrezat, leximin e nekrologjive, apo të shikuarit e filmave që trajtojnë temën e vdekjen. Sikurse shkroi Randi Paush në librin e tij bestseller “Leksioni i fundit”, mos prisni derisa të diagnostikoheni me ndonjë sëmundje të pashërueshme “për të shijuar momentin”.

Kur diçka ju mërzit në një marrëdhënie, thuajeni sa më shpejt që të jetë e mundur

Ne përgjithësi, ne njerëzve nuk na tërheqin “binjakët” tanë psikologjikë, prandaj njerëzit që lidhemi dhe më pas martohemi, kanë gjasa të jenë ndryshe nga ne. Dhe kjo është diçka normale. Po e tillë është edhe pasja e mendimeve të ndryshme mbi një sërë temash, si për nevojat, preferencat dhe temperamentin.

Një shenjë dalluese e një marrëdhënieje të mirë, nuk është mungesa e diskutimeve apo mosmarrëveshjeve, por mënyra se si i menaxhoni ato. Prandaj flisni, edhe nëse kjo ju bën ndonjëherë të ndiheni në siklet. Sa më shpejt që ta thoni diçka që ju shqetëson, ju brengos ose ju lëndon, aq më e lartë është mundësia që ju mund ta diskutoni atë në një mënyrë konstruktive – dhe më të ulëta do të jenë shanset që ankthi juaj të mbërrijë kulmin.

Provoni gjëra të reja, edhe nëse kjo do të thotë të shkoni përtej zonës tuaj të rehatisë

Disa njerëz janë më të hapur të provojnë ushqime të reja, të udhëtojnë në vende të reja, apo të eksperimentojnë me aktivitete të reja. Për të tjerët, këto mund të ngjallin shumë frikë. Këta të fundit e pëlqejnë pasigurinë dhe të panjohurën, ndaj përpiqen që ta shmangin atë sa më shumë që të jetë e mundur. Por, vetëm duke pranuar frikën nga pasigurisë, dhe duke e shtyrë veten me butësi përtej zonës sonë të rehatisë, ne mund të shmangim ankthin afatgjatë.

Mjaft duke qenë “të zënë” në çdo moment, shihni atë që ndodh

Nuk ka nevojë që të jeni të fiksuar pas punës, për të pranuar se nganjëherë e mbajmë veten shumë të zënë në mënyrë që të mos merremi me mendimet dhe ndjenjat tona. Kjo është një frikë e vjetër, por interneti e ka bërë pafundësisht më të lehtë, të mos qënit kurrë i qetë. Në librin e saj të ri, Xheni Odell, përpiqet të na mësojë “si të mos bëjmë asgjë”.

Të paktën për pak kohë. Duke i lejuar të shfaqen emocionet, imazhet, kujtimet dhe ndjesitë fizike gjatë këtyre momenteve, ne mund të mësojmë ngadalë që t’i pranojmë ato pa gjykim. Ndoshta, vëzhgimi i mendjes dhe i trupit tonë nuk është aq i frikshëm sa duket. Dhe ndoshta, mund të mësojmë edhe diçka të dobishme për veten tonë.

Kaloni kohë në natyrë, duke përfshirë edhe ushtrimet fizike

Kontakti i domosdoshëm me natyrën, i ka mbrojtur njerëzit nga ankthi problematik në shumë mënyra. Ne, mund të nxjerrim shumë justifikime për të mos dalë në natyrë. Aty mund të ketë insekte, terreni i papërshtatshëm, moti i paparashikueshëm, kafshët e rrezikshme, shumë ose pak diell, terreni baltë etj.

Gjithashtu, mund të kemi frikë se jemi shumë larg “qytetërimit”, në rast se kemi nevojë për ndihmë. Është koha të përballeni me këto frikëra që keni në kokë, dhe të hyni në natyrë. Për disa, kjo do të thotë të shkosh në parkun e afërt. Për të tjerët, udhëtime në vende turistike më të largëta. Pavarësisht hapave të vogla dhe të mëdha, ato do të thyejnë zakonin e mëparshëm, dhe do të na vendosin në kontakt me burimet e shëndetit të mirë fizik dhe mendor.

Continue Reading

Shëndeti

Antidepresivi i lirë, premtues në trajtimin e hershëm të COVID-19

Published

on

Studiuesit kanë testuar ilaçin fluvoxamine, që përdoret për trajtimin e depresionit dhe çrregullimit obsesiv-kompulsiv, ngase ai njihej se e redukton inflamacionin dhe kishte rezultuar premtues në studime më të vogla. Rezultatet e testimit studiuesit i kanë ndarë me Institutet Kombëtare amerikane për Shëndet, të cilët i publikojnë udhëzimet për trajtim, dhe shpresojnë se do të marrin rekomandim edhe nga Organizata Botërore e Shëndetësisë

Një antidepresiv i lirë ka ndikuar në uljen e rrezikut nga shtrirja në spital mes të rriturve më të rrezikuar nga COVID-19, ka treguar të enjten një studim i ri me ilaçet ekzistuese që mund të ridestinohen për përdorim në trajtimin e infeksionit me koronavirus.

Studiuesit kanë testuar ilaçin e përdorur për trajtimin e depresionit dhe çrregullimit obsesiv-kompulsiv ngase njihej se e redukton inflamacionin dhe kishte rezultuar premtues në studime më të vogla. Rezultatet e testimit, studiuesit i kanë ndarë me institutet kombëtare amerikane për Shëndet, të cilët i publikojnë udhëzimet për trajtim dhe shpresojnë se do të marrin rekomandim edhe nga Organizata Botërore e Shëndetësisë.

“Nëse OBSH-ja e rekomandon, atëherë do të shohim që do të merret gjerësisht”, ka thënë bashkautori i studimit, Edward Mills, nga Universiteti McMaster në Hamilton të Ontarios, duke shtuar se shumë vende të varfra veçse e kanë në disponim këtë ilaç.

“Shpresojmë se kjo gjë do të hapë rrugën për shpëtimin e shumë jetëve”.

Ilaçi, i quajtur fluvoxamine, do të kushtonte 4 dollarë për një trajtim ndaj COVID-19. Për krahasim, trajtimi me antitrupa IV kushton rreth 2.000 dollarë, ndërsa tableta eksperimentale antivirale e “Merckut” për COVID-19 kap vlerën prej 700 dollarësh për një trajtim. Disa ekspertë kanë parashikuar se trajtime të ndryshme do të përdoren në kombinim për luftën ndaj koronavirusit.

Studiuesit e kanë testuar antidepresivin te përafërsisht 1.500 brazilianë të porsainfektuar me virus, të cilët ishin në rrezik që të sëmureshin rëndë shkaku i problemeve të tjera shëndetësore, si diabeti.

Rreth gjysma e tyre kanë marrë antidepresivin në shtëpi për 10 ditë, ndërsa të tjerët një ilaç tjetër. Ata janë trajtuar për katër javë për të parë se kush ka përfunduar në spital apo ka kaluar kohë të gjatë në emergjencë, kur spitalet ishin të mbushur plotë.

Mes grupit që e mori ilaçin, 11 për qind kanë pasur nevojë për spitalizim apo qëndrim të gjatë në qendra shëndetësore, krahasuar me 16 për qind syresh që e morën një ilaç tjetër.

Rezultatet, të publikuara të enjten në revistën “Lancet Global Health”, ishin aq të forta saqë ekspertët e pavarur që e monitoruan studimin e rekomanduan ndërprerjen e hershme pasi që të dhënat ishin të qarta.

Tani mbetet të shqyrtohet çështja e dozimit, nëse pacientët me rrezikshmëri më të ulët mund gjithashtu të përfitojnë dhe nëse ilaçi mund të kombinohet me trajtimet e tjera.

Continue Reading

Shëndeti

Vidhen kodet e pasaportave jeshile të BE-së. Përdoren për të krijuar certifikata të fallsifikuara antikovid

Published

on

Shpiket një gjë, por shpiket edhe e kundërta e saj. Kështu ka ndodhur edhe me kodet e pasaportave jeshile që vërtetojnë se ke kryer vaksinën anticovid.

Duke cituar burime nga Italia, agjencia ANSA thekson se ato tregojnë se këto kode tani përdoren për të krijuar certifikata të falsifikuara që ofrohen në internet.

Aktualisht në rrjete qarkullojnë dy pasaporta jeshile të lëshuara në emër të Adolf Hitlerit, të cilat rezultuan të vërteta duke kontrolluar.

Sipas faqes italiane “Zezone.it”, janë dy pasaporta jeshile me emrin Adolf Hitler, njëra me datëlindje 1900 dhe tjetra 1930. Të dyja kanë një kod QR të vlefshëm dhe faqja pretendon se këto kode janë vjedhur në Poloni.

Ende nuk dihet numri i kodeve të vjedhura, ndërsa sipas informacioneve zyrtare nuk dihet se në cilin shtet janë vjedhur.

Hetimi është në vazhdim dhe takime janë mbajtur në disa nivele evropiane. Meqë ra fjala, në Itali nevojitet një pasaportë e gjelbër nga 15 tetori për të hyrë në vendin e punës.

Continue Reading

Shëndeti

Çfarë është COVID-i i zgjatur? Ja si mund të kurohet

Published

on

Disa nga simptomat e sëmundjes së zgjatur të shkaktuar nga koronavirusi janë lodhja kronike, turbullimi i mendimit, pagjumësia, probleme në zemër dhe vështirësi në frymëmarrje. Korrespondentja e Zërit të Amerikës, Lesia Bakalets, përshkruan se çfarë përfaqëson realisht COVID-i zgjatur dhe se si po e kurojnë atë mjekët në Amerikë, transmeton VOA.

Pasi kalojnë COVID-19ën, shumë njerëz ankohen për simptoma të vazhdueshme për muaj të tërë.

Sipas një raporti të organizatës jofitimprurëse FAIR Health, rreth 15-20% e atyre që janë prekur nga virusi vazhdojnë të kenë simptoma muaj më vonë.

14-vjeçarja Seaenna nga shteti Cleveland u sëmur nga COVID-i rreth një vit më parë.

“Kur m’u rikthye nuhatja, ishte komplet ndryshe, si e transformuar. Ushqimet e rregullta më japin shijen e llastikut që digjet. Një aromë e çuditshme”, thotë ajo.

Doktorët e quajnë këtë periudhë të gjatë rikuperimi “COVID-i i zgjatur”. Organizata Botërore e Shëndetësisë e quan periudhën “post-COVID”.

“Ndodh tek individët që janë infektuar nga SARS-CoV-2, zakonisht rreth tre muaj më pas. Me simptomat që dallohen për të paktën tre muaj pas infektimit me koronavirus dhe zgjasin edhe për të paktën dy muaj të tjerë dhe që nuk mund të shpjegohen nga një diagnozë tjetër”, thotë Janet Diaz, nga Organizata Botërore e Shëndetësisë.

Qendrat për Kontrollin dhe Parandalimin e Sëmundjeve përshkruajnë 18 simptoma të zakonshme, përfshirë kollën, dhimbjet e kokës, probleme me frymëmarrjen, pagjumësinë, çrregullimin e rrahjeve të zemrës dhe shpesh lodhje kronike.

“Është shumë e pranishme. Lodhja kombinohet me simptoma si ‘mjegullimi i trurit’, që do të thotë vështirësi në përqëndrim, mungesë kthjellimi…”, thotë Linda Geng, nga klinika “Stanford PACS”.

Dr. Geng kuron pacientët me COVID-in e zgjatur.

Ajo thotë se sfida është diagnostikimi i saktë, që këto simptoma të zakonshme janë për shkak të post-COVID-it dhe jo diçkaje tjetër.

“Ka një lidhje mes vazhdimësisë së simptomave, që nuk i kishin përpara se të merrnin COVID-in dhe të faktit që nuk patën ndryshime të tjera shëndetësore. Kjo eliminon disi mundësitë e tjera”, thotë doktore Geng.

Qendrat shëndetësore për COVID-in e zgjatur po shtohen me shpejtësi në Shtetet e Bashkuara.

Në mediat sociale janë krijuar grupe për të ndihmuar pacientët që përballen me pasojat mendore të simptomave post-COVID.

Ish-infermierja Laney Bond thotë se grupit të saj në mediat sociale i shtohen 1500 persona në javë.

“Jemi përqëndruar tek informimi i pacientëve”, thotë ajo.

Institutet Kombëtare të Shëndetit kanë filluar një projekt prej 470 milionë dollarësh, për të mësuar më shumë rreth simptomave të post-COVID-it dhe për të gjetur një kurë për to.

Continue Reading

Aktuale