Prokuroria Publike ka intensifikuar hetimet lidhur me rastin në Reçicë të Vogël në Tetovë, ku para një muaji nga të shtënat pësuan dy të rinj, njofton Alsat-M, duke u thirrur në një prononcim të organeve hetimore, por pa komentuar deklaratën e djeshme të Jusuf Bilallit, prindit të njërit nga të plagosurit.

Siç mësohet, prokuroria ka kërkuar nga Ministria e Brendshme përshpejtimin e procedurës së ekspertizës ligjorë të armëve të konfiskuara në vendin e ngjarjes.

Jo zyrtarisht mësohet se një pistoletë dhe një pushkë gjuetie e cila i takon djalit të deputetit të BDI-së, Xhevat Ademi, janë marrë në ekspertizë së bashku me një pistoletë të një tjetër njeriu që ka qenë prezent në dasmë. Organet e ndjekjes janë edhe në kërkim edhe të gëzhojave, që nuk janë gjetur në vendin e ngjarjes.

Ndërkohë, deputeti BDI-së, Ademi nuk i është përgjigjur interesimit të televizionit Alsat për të komentuar deklaratën e Jusuf Bilallit i cili fajëson atë, me emër dhe mbiemër si doras i plagosjes.

“Deputeti i ka ra revoles në tavolinë, edhe unë e kam parë se e ka goditur djalin e tij, edhe unë si mjek kam vrapu që t’i ndihmo djalit të atij, kur kam arritur aty, ska pasur as tre hapa, kur arrita tek djali i Xhevat Ademit, djali im më tha, o babi, mua më vranë”, ka thënë dje Jusuf Bilalli.

Para prononcimit të Bilallit, Xhevat Ademi, hodhi poshtë të gjitha akuzat që i bëhen, duke mohuar që të ketë gjuajtur natën kur u plagosën dy të rinjë.

“Është e vërtetë se unë dhe familja ime kemi qenë pjesëmarrës në këtë aheng familjar ku dhjetëra persona në mënyrë të pahijshme kanë gjuajtur me armë zjarri, por nuk është aspak e vërtetë se kam gjuajtur edhe unë…”ka thënë Xhevat Ademi, deputet i BDI-së.

Organet e ndjekjes deri tani kanë kryer ekspertizë me parafinë në disa persona, përfshirë këtu edhe deputetin e BDI-së Xhevat Ademi.

Ky i fundit deri tani nuk është bastisur e as që është kontrolluar nëse posedon apo jo pistoletë tjetër përveç atyre që janë dorëzuar për ekspertizë.

Prokuroria nga SBP-Tetovë ka kërkuar që të merren në pyetje së paku 10 dëshmitarë, të cilët e kanë parë ngjarjen kur ka ndodhur. Dy të plagosurit, tani më janë në gjendje stabile dhe jashtë rrezikut për jetë. Siç mësohet edhe i plagosuri që ka qenë në gjendje më kritike, ka dhënë dëshmi për policinë në lidhje me rastin.