Pushteti dhe opozita, në takimin e sotëm punues për ligjin për prokurorinë publike u dakorduan vetëm për një gjë, që Katica Janeva nuk është më temë diskutimi për t’u bartur në Prokurorinë e ardhshme për krim dhe korrupsion të nivelit të lartë. Megjithatë, palët nuk patën asnjë përparim në negociata sa u takon pikave të tjera ku edhe më herët kishin përplasje. Në seancë plenare ligji është caktuar për nesër, kurse opozita nuk planifikon të votojë as nevojën për sjelljen e tij.

“Do të ishte shumë më korrekte nëse pushteti, tekstin e propozim/ligjit do ta propozonte në pajtim dhe bashkë me opozitën. Por ata kanë vendosur që këtë ligj ta propozojnë pa konsultime me opozitën dhe nga kjo pikëpamje nuk do të mund të presim qasje pozitive nga ana jonë, kur nuk ka qasje pozitive nga ana e LSDM-së dhe BDI-së gjatë përpilimit të propozim/ligjit. Por, lejmë hapësirë që në debatin e komisionit, me amendamente cilësore ta përmirësojmë tekstin e ligjit” – deklaroi Antonio Milloshovski, VMRO-DPMNE.

Deri të enjten pritet të ketë edhe një takim tjetër përpara se opozita të ketë përpiluar vërejtjet në formë amendamentesh.

“U dakorduam që vërejtjet që i ka VMRO-DPMNE-ja t’i përpilojë në amendamente dhe duke pasur parasysh që nesër fillon procedura parlamentare debati në komision duhet të fillojë të premten. Deri atëherë duhet të dorëzohen amendamente” – tha Renata Deskoska, ministre e Drejtësisë.

Pushteti kërkon që prokurorëve që kanë mandat, të mos u ndërpritet mandate me ligj, personat e punësuar në Speciale të ketë vazhdim të punës kurse hetuesit të barten në prokurorinë e re ose të kthehen në MPB për të kaluar përsëri procedurën e përzgjedhjes. Poashtu, ata propozojnë që lëndët e filluara nga Specialja të barten në Prokurorinë për krim të organizuar dhe të vazhdohen prej aty ku kanë mbetur. Opozita kundërshton bartjen e ekipit të Janevës në prokurorinë e re por për këtë pushteti mbron idenë e vazhdimit të mandatit të tyre pavarësisht zhvillimeve me rastin “Reket”.

“Përgjegjësia personale nuk duhet të lidhet me përgjegjësinë kolektive. Shkatërrimi i një institucioni nuk duhet të varet nga ajo se kush është në krye të atij institucioni” – u shpreh Renata Deskoska, ministre e Drejtësisë.

Amendamente për propozim/ligjin për prokurorinë publike do të ketë edhe nga BDI-ja.

“Ne kemi dy intervenime kyçe për të cilat tashmë e kemi njoftuar opinionin; kanë të bëjnë me përdorimin zyrtar të ligjit për përdorimin e gjuhëve dhe përdorimin e votimit të dyfishtë, të Badenterit, në zgjedhjen e prokurorëve në këshillin e prokurorëve. Këto janë dy kërkesat tona që do të dorëzohen në formë të amendamenteve. Shpresoj që nesër seanca të kalojë ashtu siç duhet dhe më pas debati në zhvillohet në komisionin për çështje evropiane” – theksoi Artan Grubi, BDI.

Në rast se nuk sigurohet shumica e nevojshme për ligjin për prokurorinë publike, sipas pushtetit, këshilli i prokurorëve duhet të gjejë zgjidhje për vazhdimin e punës së Prokurorisë Speciale.

BURIMI: Alsat-M