Connect with us

Lajme

Vit i aferave në vend të vitit ekonomik

Published

on

Në vend të mobilizimit të përgjithshëm për reforma të fuqishme, rigjallërim të investimeve dhe projekteve ekonomike që me të vërtetë do të përmirësojnë jetën e qytetarëve, jemi përballur me gjeneratorë të një krize të re politike që do të ndikojë më tej në vend dhe në tetor të marrë një përgjigje negative nga Brukseli për datën e fillimit të negociatave për anëtarësim me Unionin.

Pas dushit të ftohtë nga Brukseli në qershor, në periudhën deri në tetor të gjitha forcat duhej të mobilizoheshin për të realizuar reformat e nevojshme. Por jemi dëshmitarë që nuk është bërë përparim i vërtetë i reformave në terren, dhe mega-skandali i quajtur “Zhvatja”, ku ekzistojnë indikatorë të fortë të korrupsionit të lartë, absorbon energjinë e reformave të planifikuara. Dhe këtu përsëri gabuan autoritetet e shtetit, të cilat në vend që të mobilizohen për një përparim të shpejtë institucional në çështjen “Zhvatja”, ato vazhduan me oraret e tyre të rregullta të pushimeve, përfshirë edhe kryeprokuroren që merrej me këtë çështje.

Në pushim prej fillimit të muajit janë edhe deputetët e Parlamentit të Maqedonisë, i cili nuk do të punojnë deri më 27 gusht, kur është caktuar seanca për të diskutuar ndryshimet në Ligjin për Prokurorinë Publike, i cili do të vendosë fatin e PSP-së. Bisedimet në terren midis partive mbi këtë ligj janë të bllokuara, kështu që është e paqartë nëse do të ketë një marrëveshje konkrete për këtë çështje deri më 27 gusht. Pikërisht fati i PSP-së është përmendur deri vonë si një nga kushtet për dhënien e një date në tetor. Situata është e komplikuar edhe më tej pas njoftimeve të liderit të VMRO-DPMNE-së opozitare, Hristijan Mickoski, se në periudhën e ardhshme, aktivitetet e tyre do të synojnë bllokimin e institucioneve, dhe nuk përjashtoi mundësinë e protestave në rrugë. Nuk ka ndonjë veprim as nga Qeveria, edhe pse kryeministri mban qëndrimin për një “bum investimesh” në periudhën e ardhshme. Aktivitete për informim të opinionit zyrtarët kanë në rrjetet sociale, Facebook dhe Tuitter, ku kryeministri dhe disa ministra paralajmërojnë projekte.

“Një miliard janë projektuar në rrugë, mbi një miliard në hekurudha, mbi një miliard në energjetikë – me HC ‘Çebren’, me largpërçuesin në drejtim të Shqipërisë dhe përçuesin e gazit. Po investojmë edhe në një qendër të re klinike, në bujqësi dhe zhvillim rural, në impiante për trajtimin e ujërave të zeza, impiante rajonale për grumbullimin dhe përpunimin e mbeturinave, sistemet e ujësjellësit dhe kanalizimeve, shkolla dhe kopshte dhe projekte të tjera për nevojat reale të të gjithë qytetarëve”, theksoi kryeministri Zaev në një postim të fundit në Facebook. Në mënyrë të veçantë, nga shumica e masave të paralajmëruara, vetëm aplikacioni telefonik “TVSH-ja ime” ka filluar të funksionojë, me anë të të cilit, konsumatorët duke skanuar llogaritë – do të jenë në gjendje të marrin disa nga paratë e paguara në TVSH. Disa nga qytetarët e anketuar janë gjithnjë e më skeptik, veçanërisht në lidhje me njoftimin se do të zhvillohen reforma dhe se investimet e huaja do të përshpejtohen, dhe se vendi mund të marrë lajme të mira nga Brukseli në tetor.

“Miliarda janë paralajmëruar edhe në të kaluarën. Për njeriun e thjeshtë do të jetë vetëm më keq, ndërsa politikanët edhe pse debatojnë para kamerave, është e qartë se ata po drejtojnë bizneset private dhe po i mbushin xhepat”, thotë profesori i ekonomisë, Neritan Turkshi. Ai shprehet se dëshmia më e mirë se asgjë nuk po funksionon në vend është afera e fundit “Zhvatja”. “Nëse diçka e tillë do të ndodhte në Suedi, Norvegji apo ndonjë vend tjetër normal evropian, hetimi do të kishte përfunduar. Te ne, të gjithë kanë shkuar në pushime, kështu që edhe po të ishte fajtor dikush, do të ketë kohë të mjaftueshme për të mbuluar gjurmët. Nuk e kuptoj në një situatë të tillë, kur asgjë nuk po funksionon, kush do të na kishte dhënë datë në tetor”, shprehet Turkeshi, ndërsa përmend dështimin me investimet kapitale që dukshëm kanë rënë nga vitet e kaluara.

“Kaluan gati tetë muaj ndërsa investimet e planifikuara kapitale nuk janë realizuar as 50 për qind. Është ulur dukshëm numri i investitorëve të huaj, ndërsa ekonomia po vazhdon të fundoset. E gjithë kjo nga mungesa e sigurisë politike dhe skandaleve që ndodhën dhe po ndodhin për çdo ditë që në kreun e shtetit e deri te më i vogli në detyrë”, thotë profesori i ekonomisë, NeritanTurkeshi.

Fatkeqësisht, as analistët politikë nuk janë optimistë në lidhje me perspektivat e vendit për rrugën e saj eurointegruese. “Nuk kam asnjë optimizëm që gjërat në vend së shpejti do të përmirësohen. Ne shohim gjëra të çuditshme që ndodhin çdo ditë, dhe askujt nuk i intereson populli. Çdo ditë futemi nga marrëzi në marrëzi, nga dubioza në dubiozë. Në një situatë të tillë, unë nuk di si të shpresoj për një datë në tetor”, konsideron diplomati Dragan Janjatov. Ai shtoi se ndihet i tërhequr ndaj asaj që po ndodh dhe se në shtet mbizotëron një krizë e moralit politik.

“Ky popull kërkon pjekuri për gjendjen e vendit të vet. Të gjithë betohen në atdheun, dhe të gjithë janë duke e shkatërruar. Në vendin tonë politika është bërë biznes, dhe biznesi është politikë”, thekson Janjatov. Derisa ditët deri në tetor po afrohen, po bëhet gjithnjë e më e qartë se premtimet për një rritje të fortë të BPV-së, madje edhe stimujt më të fortë për ekonominë reale, bujqësinë, valën e krijimit të vendeve të punës, etj., do të jenë më vështirë për t’u arritur, ndërsa dhënia e datës duket edhe e më largët. Sigurisht që nuk është vonë, por thënia popullore se “Askush nuk mund t’ia bëjë jetën më keq njeriut se vetvetja” përsëri është më e dëgjuara nga qytetarët.

 

BURIMI: koha.mk

Continue Reading

Kosovë

Mërgata për tetë muaj dërgoi 750 milionë euro në Kosovë, mbi 140 milionë më shumë se viti i kaluar

Published

on

By

Mërgata për tetë muaj dërgoi 750 milionë euro në Kosovë, mbi 140 milionë më shumë se viti i kaluar

Mërgata vazhdon të kontribuojë në dërgimin e remitencave për familjet e tyre në Kosovë.

Pavarësisht pandemisë, deri në fund të muajit gusht 2020, në drejtim të vendit tonë janë dërguar 749.7 milionë euro, ku sipas Bankës Botërore (BB), mërgata ka ndikuar në rritjen ekonomike të Kosovës.

Të dhënat e Bankës Qendrore të Kosovë (BQK) tregojnë se gjatë këtij tetëmujori, diaspora ka dërguar 141.2 milionë euro më shumë sesa viti 2020, shkruan Telegrafi.

Vlera më e lartë e dërguar në drejtim të Kosovës ishte e muajit maj me 113.3 milionë euro.

Për sa i përket dërgesave të mërgatës sipas vendeve, Gjermania është shteti ku më së shumti dërgohen para në drejtim të Kosovës.

Nga Gjermania kanë ardhur 39.5 për qind e dërgesave, ndjekur nga Zvicra me 17.3 për qind dhe Shtetet e Bashkuara të Amerikës me 7 për qind.

Sipas kanaleve të dërgimit, BQK thotë se, 435.1 milionë euro janë transferuar me anë të agjencive të dërgesave të parëve, kurse pjesa tjetër me anë të bankave komerciale.

Në raportin e saj të fundit lidhur me ndikimin e pandemisë COVID-19 në ekonomi, BB thotë se rritja e konsumit me ardhjen e mërgatës ka kontribuar në rritjen ekonomike të Kosovës për vitin 2021.

Banka shpjegon se deri në fund të këtij viti, kjo rritje do të jetë 7.1 për qind, kundrejt një tkurrje prej 5.3 për qind që ishte vitin e kaluar.

“Aktiviteti ekonomik në vitin 2021 pritet të zgjerohet me 7.1 për qind kundrejt një rikthimi të mërgatës, masave mbështetëse fiskale dhe rritja e huadhënies. Modeli i rritjes së Kosovës është kryesisht i bazuar në konsum, me një mbështetje të konsiderueshme nga mërgata”, thuhet raport, shkruan Telegrafi.

Remitencat sipas kanaleve të dërgimit, janar-gusht 2021 | Burimi: BQK

BB thekson se rritja ekonomike është rikthyer në territor pozitiv gjatë tremujorit të katërt 2020.

“Ekonomia gjatë vitit 2020 u tkurr me 5.3 për qind, por informaliteti i lartë ka të ngjarë të zbeh ndikimin e plotë ekonomik dhe social të pandemisë. Punësimi formal tejkaloi ndikimin e pandemisë, por pjesëmarrja e ulët e fuqisë punëtore, veçanërisht për gratë, vazhdon të jetë ndër kufizimet kryesore në vend. Rritja ekonomike u kthye në territor pozitiv gjatë tremujorit të katërt të vitit 2020”, vijon BB.

Ndërsa, Banka Botërore thotë se që nga shpallja e pavarësisë, në Kosovë janë dërguar 12.6 miliardë euro, përcjell Telegrafi.

Sipas BB-së, pjesëmarrja e remitencave në Prodhimin e Brendshëm Bruto të Kosovës është 18.5 për qind.

Shuma e remitencave të dërguara sipas viteve në Kosovë: 2008 – 858 milionë euro, 2009 – 865 milionë euro, 2010 – 825 milionë, 2011 – 814 milionë euro, 2012 – 775 milionë euro, 2013 – 867 milionë euro, 2014 – 901 milionë euro, 2015 – 796 milionë euro, 2016 – 808 milionë euro, 2017 – 911 milionë euro, 2018 – 1.13 miliard euro, 2019 – 1.23 miliard euro dhe 2020 – 1.8 miliard euro.

Nga rezultatet preliminare të regjistrimit të diasporës, numri i qytetarëve të Kosovës që jetojnë në vende të ndryshme të Evropës dhe botës, të cilët i janë përgjigjur regjistrimit është rreth 350 mijë.

Continue Reading

Lajme

Dhunë fizike dhe psikologjike ndaj grave, arrestohen 2 persona

Published

on

By

Dhunë fizike dhe psikologjike ndaj grave, arrestohen 2 persona

Dy persona janë arrestuar në Tiranë e Durrës, pasi dyshohen se kanë ushtruar dhunë ndaj partnereve të tyre.

Në Durrës, u arrestua 38-vjeçari me iniciale B.K.për dhunë ndaj bashkëshortes.

Në Tiranë, u arrestua 33-vjeçari me iniciale L.R., pasi dyshohet se ka dhunuar fizikisht dhe psikologjikisht vajzën me të cilën bashkëjetonte. Policia njofton se pas padisë, ka lëshuar një urdhër mbrojtje për viktimën.
Të dyshuarit do të hetohet nga prokuroritë përkatëse të Tiranës dhe Durrësit.

Continue Reading

Lajme

Maqedonia, Bullgaria dhe Shqipëria sot nënshkruajnë memorandumin trepalësh për Korridorin 8

Published

on

By

Maqedonia, Bullgaria dhe Shqipëria sot nënshkruajnë memorandumin trepalësh për Korridorin 8

Maqedonia, Bullgaria dhe Shqipëria do të nënshkruajnë memorandumin trepalësh që do të nënshkruhet sot në Sofje.

Sipas njoftimeve nga kabineti i ministrit të Transportit, Blagoj Boçvarski po udhëton sot në Bullgarinë fqinje.

Ky memorandum është për përfundimin e Korridorit 8 dhe sipas qëllimit të deklaruar është përcaktimi i gatishmërisë së tre vendeve për planifikim afatgjatë dhe zhvillim të koordinuar të Korridorit 8 me fokus në projektet që janë me rëndësi më të madhe për rajonin dhe gatishmërinë për të zbatuar masat për transport të shpejtë dhe të pandërprerë të mallrave në pikat kufitare./Telegrafi/

Continue Reading

Aktuale