Së shpejti kabineti i Qeverisë së Maqedonisë së Veriut do të pësojë ndryshime.

Siç njofton televizioni Alsat-M, ky ndryshim vjen pasi duhet që të emrërohet vendi i kreut të Ministrisë së Financaave, i cili nga ndryshimet e fundit, ka ngelur bosh, pasi Komisioni i Antikorrupcionit vendosi që kryeministri Zaev nuk mund të udhëheq edhe me një ministri tjetër.Që nga shkarkimi i Dragan Tevdovskit në qershor, me Ministrinë e Financave administrativisht ka udhëhequr zv.ministrja Shiret Elezi kurse politikat financuese janë drejtuar nga kryeministri Zoran Zaev, shkruan in7.

Siç mësohet, për këtë post lakohen emrat e tre kandidatëve, që të tre kandidatet janë femra, Nina Angellovska, Tatjana Shterjova si dhe guvernatorja Anita Bezhovska. Megjithatë, në këtë garë, siç thonë bueimet e cituara më lartë, prin Nina Angellovska bashkëthemeluese dhe drejtore ekzekutive e platformës Gruper dhe presidente e Asociacionit Komercial Eletronik.

Ndryshime të tjera në Qeveri do të ketë edhe në Ministrinë e Ekonomisë, kështu nga detyra e tij si zv.ministër i Ekonomisë pritet të largohet edhe Kire Naumov për t’u bërë drejtor në Bankën Zhvillimore të Maqedonisë së Veriut. Ndërkaq, në vend të tij, do të jetë njëra prej dy kandidateve që mbeten nga gara për postin e financave, Tatjana Shterjova ose guvernatorja Anita Bezhovska.

Në qershor u bënë ndryshimet e fundit në kabinetin qeveritar. Sadulla Duraku nga ministër i Ekologjisë u vendos në postin e ministrit për Sistem Politik dhe Marrëdhënie mes Bashkësive kurse në Ekologji erdhi Naser Nuredini, Hysni Ismaili u emërua ministër i Kulturës, Trajan Dimkovski u emërua ministër i Bujqësisë dhe Goran Milevski, ministër i Vetëqeverisjes Lokale.