Përveç përplasjeve të Kryeministrit Zoran Zaev me akuzat për çështjen e rastit “Zhvatja” dhe implikimit të mundshëm të shumë zyrtarëve në këtë skandal, sot përmes mediave ai është akuzuar edhe nga kreu i Komunës së Sarajit Blerim Bexheti, të cilit i është kundërpërgjigjur përmes rrjetit social Facebook, shkruan in7

Kështu kreu i Komunës së Sarajit, Blerim Bexheti ka akuzuar se kryeministri aktual Zoran Zaev ka kërkuar nga ai që të ndikojë në ndërrimin e një kryetari të një gjykate.

“Unë kam refuzuar këtë kërkesë të kryeministrit duke e sugjeruar se nuk është mirë që pushteti ekzekutiv të përzihet në punën e pushtetin gjyqësor i cili është i pavarur. Refuzimi i kërkesës së Zaevit ka rezultuar në një farë forme me hakmarrje, duke më vënë në shpinë Antikorrupsionin”, deklaroi Bexheti.

Nga ana tjetër Kryeministri Zoran Zaev i është kundërpërgjigjur akuzave të kryetarit të Komunës Saraj, Blerim Bexheti, përmes rrjetit social Facebook.

“Edhe sot e përsëris qëndrimin se shtetin juridik mund ta fitojmë ashtu siç të gjithë e dëshirojmë vetëm nëse mundësojmë që lirshëm dhe të pavarur të vendosin të gjithë pjesëmarrësit në jurisprudencë, pa u bërë presion për thelbin e vendimeve të tyre, por gjithsesi edhe pa iu lejuar apo t’u bëhet presion për shtyrje të vendimeve. Bexheti, politikanët dhe qytetarët e dinë mirë se shtyrja e vazhdueshme e vendimeve në këshillin gjyqësor, në gjykatën supreme, në gjykatat e apelit si dhe gjykatat themelore nëpër shtet janë një ndër shkaqet më serioze për kthimin e ngadalshëm të shtetit juridik dhe ndarjes së drejtësisë. Plotësisht, me Bexhetin bisedova edhe me rastin e spekulimeve në opinion se dikush po e mbron Jovo Vangellovskin në Këshillin gjyqësor. Më interesonte nëse ka të vërtetë në atë dhe i thashë se nuk është me vend një sjellje e tillë, nëse ekziston. Secili duhet ta bartë përgjegjësinë e vet në pajtim me ligjin, pa marrë parasysh funksionin që e kryen. Këtë ia thashë Bexhetit, këtë e them edhe publikisht”, ka shkruar Zaev në profilin e tij zyrtar në rrjetin social Facebook./in7.tv/