Connect with us

Bota

Terrorizmi në rritje me shtimin e imigracionit, por vetëm ai i ekstremit të djathtë

Published

on

Muajin e kaluar, Valter Lybke, një politikan konservator gjerman që mbështeste politikën pro-refugjatëve të Angela Merkel, u qëllua për vdekje nga një terrorist i ekstremit të djathtë. I dyshuari, ka lidhje me neonazistët dhe ekstremistët e tjerë të krahut të djathtë, ndërsa edhe në vitin 1992, rezulton të ketë plagosur rëndë një emigrant.

Me shumë gjasa, Lybke ishte shënjestruar për shkak të mbështetjes së tij të hapur ndaj refugjatëve. Ai mori shumë kritika në internet nga mbështetës të ekstermit të djathtë. Shumë njerëz, mendojnë se më shumë emigrim në vendet perëndimore, do të sjellë më shumë terrorizëm, pasi emigrantët nga kulturat jo-perëndimore, kanë më shumë gjasa që të jenë terroristë.

Por studimi që kam kryer kohët e fundit, arrin në një përfundim shumë më ndryshe. Nuk janë emigrantët, ata që po angazhohen në akte terroriste në Evropën Perëndimore. Përkundrazi, janë qytetarët vendas, dhe pikërisht për shkak të armiqësisë së tyre ndaj emigrantëve.

Studimi im, i botuar në Gazetën e Studimeve të Sigurisë Globale, argumenton se ankesat ndaj emigrantëve, mund të nxisin sulme të dhunshme nga mbështetësit e ekstremit të djathtë. Unë e fillova studimin tim, duke vëzhguar marrëdhëniet midis emigracionit dhe terrorizmit, gjatë dekadave të fundit në 8 vende të Evropës Perëndimore:Belgjikë, Francë, Gjermani, Greqi, Itali, Hollandë, Spanjë dhe Britani.

Unë vërejta shumë shpejt ekzistencën e një modeli të qëndrueshëm:Kur nivelet e imigracionit në një vend rriten, po kështu ndodh edhe me numrin e përgjithshëm të sulmeve terroriste. Në pamje të parë, kjo mund të sugjerojë se janë emigrantët ata që i kryejnë këto sulme.

Përcaktimi nëse kjo është apo jo e vërtetë, kërkon konsultimin e shumë të dhënave. Fatmirësisht, të dhënat në dispozicion mbi sulmet terroriste, përfshijnë zakonisht disa informacione mbi grupin ose individin përgjegjës për aktin.

Pas një shqyrtimi më të afërt të të dhënave, unë zbulova se lidhja midis emigrantëve dhe sulmeve terroriste, është e pranishme vetëm kur ndodhin sulme terroriste nga grupime dhe individë të ekstremit të djathtë.

Nuk ka asnjë lidhje midis emigracionit dhe formave të tjera të terrorizmit, përfshirë terrorizmin e majtë, dhe atë nga grupe separatiste si IRA në Irlandën e Veriut apo ETA në Spanjë. Nga ana tjetër, shumë njerëz mendojnë se shtimi i emigracionit, nxit konkurrencën për vendet e punës.

Kjo mund të shpjegojë terrorizmin, nëse terroristët e krahut të djathtë nxiten të ndërmarrin veprime të dhunshme, për shkak të anktheve ekonomike të shkaktuara nga rritja e emigracionit. Megjithatë, ka pak dëshmi se kjo është e vërtetë.

Nivelet e emigrimit, janë më të lidhura me terrorizmin e krahut të djathtë, sesa masat që lidhen me ekonominë, siç është PBB-ja dhe shkalla e papunësisë. Refugjatët, që janë më pak të prirur të shtojnë konkurrencën për vendet e punës, lidhen gjithashtu me terrorizmin e krahut të djathtë.

Terrorizmi i krahut të djathtë është mjaft i shpeshtë, si në Shtetet e Bashkuara ashtu edhe në Evropë. Ndërsa vrasja e Valter Lybkes bëri bujë në media, shumë sulme ndaj emigrantëve nga ana e terroristëve të krahut të djathtë, kanë një vëmendje të pakët në mediat ndërkombëtare.

Kjo dukuri është më e theksuar, kur emigrantët vijnë nga vendet me shumicë myslimane. Terrorizmi i krahut të djathtë, nuk duket se rritet kur ka një emigrim më të lartë nga vendet e tjera evropiane. Studime të tjera, tregojnë se mbështetja individuale ndaj partive të ekstremit të djathtë dhe politikave të tyre, rritet kur dikush ka më shumë pakënaqësi ndaj emigrantëve.

E gjithë kjo tregon se terrorizmi i krahut të djathtë, është një reagim ndaj një grupimi të jashtëm. Për shembull, shihni të dhënat për Gjermaninë. Gjatë viteve 2008-2015, sipas bazës së të dhënave për terrorizmin global, në vend ka pasur 86 sulme terroriste.

Duke shqyrtruar secilin prej këtyre sulmeve, zbulova se 60 prej tyre mund të përshkruhen në mënyrë të arsyeshme si terrorizëm i krahut të djathtë. Këto sulme, kishin më shumë gjasa të ndodhnin në zonat, ku një pjesë më e madhe e popullsisë është e huaj.

Shumica e tyre ishin të drejtuara kundër emigrantëve ose qendrave të strehimit të azilkërkuesve. Vrasja e Lybkes, përputhej me këtë model të gjerë. Shumë ekspertë e shohin terrorizmin, si një mjet që përdoret nga grupet e ndryshme, për të çuar përpara synimet e tyre politike.

Gjetjet e mia sugjerojnë se disa forma të terrorizmit, mund të jenë thjesht produkt i anktheve kulturore, nga ana e njerëzve që janë radikalizuar politikisht, siç ishin në sulmet terroriste në 2 xhamitë e Kristçërç të Zelandës së Re, në xhaminë e Kebekut në Kanada, apo masakrën në sinagogën e Pitsburgut në SHBA.

Dhe kjo ka shumë rëndësi. Ka pak dëshmi që të mbështetet pohimi i zakonshëm, se sa më shumë emigrantë të hyjnë në një vend, aq më shumë terroristë do të ketë. Për më tepër, retorika politike që demonizon emigrantët, mund të ushqejë potencialisht akte dhune.

Para vrasjes së Lybkes, e djathta ekstreme kishte nisur një valë kërcënimesh online ndaj tij, duke përfshirë edhe komentin e vrasësit të politikanit në YouTube, që sulmonte pikërisht politikën pro-refugjatëve të Lybkes. Emigrantët, nuk përbëjnë rrezik për sigurinë kombëtare. Përkundrazi, janë ekstremistët e krahut të djathtë që urrejnë emigrantët, ata që rrisin kërcënimin nga terrorizmi./përktheu dhe përshtati in7.tv/

 

BURIMI: The Washington Post

Continue Reading

Bota

Tym e zjarr në kampin ku ndodhen ushtarët shqiptarë, NATO gati kundër rusëve

Published

on

Forcat e NATO-s në Kamp Adazi të Letonisë kanë kryer stërvitjen e radhës me artileri të rëndë gjatë ditëve të fundit si një kundërpërgjigje ndaj kërcënimeve ruse ndaj aleancës dhe vendeve Balltike.

Stërvitja “Shigjeta e Hekurt” u zhvillua nga forcat e artilerisë së vendeve të NATO-s që gjenden prej disa vitesh pranë Rigas në Letoni, ku janë pozicionuar edhe ushtarët shqiptarë.

Këta të fundit shërbejnë si njësi e demontimit të minave. Në këtë mision humbën jetën dy vite më parë edhe dy ushtarakët shqiptarë Zarife Hasanaj dhe Klodian Tanushi.

NATO ka shtuar ndjeshëm prezencën e saj në vendet balltike pas kërcënimeve ruse, ndërkohë që sëfundmi pritet t’i bashkohen aleancës edhe Finlanda me Suedinë. /abcnews.al

Continue Reading

Bota

Lajmi i fundit / Marrëveshje midis Rusisë dhe Ukrainës

Published

on

Ushtria ruse urdhëroi një armëpushim në zonën e fabrikës së çelikut Azovstal dhe hapi një korridor humanitar, njoftoi sot Ministria e Mbrojtjes e Rusisë, transmeton Demokracia.com.

Është arritur një marrëveshje me përfaqësuesit e palës ukrainase për evakuimin e ushtarëve të plagosur në institucionet shëndetësore, transmeton RIA Novosti.

“Më 16 maj, si rezultat i negociatave me përfaqësuesit e personelit ushtarak ukrainas të bllokuar në territorin e uzinës metalurgjike Azovstal në Mariupol, u arrit një marrëveshje për evakuimin e të plagosurve”, tha ministria ruse në një deklaratë.

Të plagosurit u transferuan në një spital në Novoazovsk në territorin e Republikës së vetëshpallur Popullore të Donetsk (DNR). /Demokracia.com/

Continue Reading

Bota

Nuk ka durim në BE: Serbia duhet t’ia vendosë sanksionet Rusisë

Published

on

By

Nuk ka durim në BE: Serbia duhet t’ia vendosë sanksionet Rusisë

Dy mesazhe të pakëndshme ka marrë presidenti serb, Aleksandër Vuçiq në Bruksel nga Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell. E para ishte një mesazh i qartë se BE-ja pret që të gjitha vendet e rajonit të mbështesin sanksionet kundër Rusisë dhe e dyta ishte njoftimi i ministres së Punëve të Jashtme të Kosovës, Donika Gërvalla-Schwartz se vendi do të paraqiste kërkesë formale për anëtarësim në Këshillin e Evropës.

Siç e kishte pranuar edhe vetë Vuçiq, këto dy tema janë aq të vështira për Serbinë, saqë ai kishte thirrur një mbledhje urgjente të Këshillit të Sigurisë Kombëtare.

Deri më tani, Serbia ka arritur disi t’i rezistojë presionit për të vendosur sanksione ndaj Rusisë, siç kanë bërë të gjitha vendet e tjera.

Siç shkruan mediumi kroat Jutarni List, edhe pse disa përfaqësues të institucioneve të BE-së janë përpjekur të relativizojnë pikëpamjet e Serbisë dhe të tregojnë mirëkuptim, shumë shtete anëtare janë të indinjuara nga pikëpamjet e Beogradit dhe po kërkojnë qartë që Serbia të vendosë përfundimisht në cilën anë dëshiron të jetë.

Pakoja e gjashtë e sanksioneve ekonomike kundër Rusisë

Borrell ka falënderuar dje të gjitha vendet e Ballkanit Perëndimor që kanë mbështetur BE-në në qëndrimet e tyre në lidhje me Rusinë. Përveç Serbisë, të gjitha vendet në rajon mbështetën sanksionet kundër Rusisë.

Serbia kishte votuar në OKB për përjashtimin e Rusisë nga Këshilli i të Drejtave të Njeriut. Megjithatë, për BE-në kjo nuk mjafton dhe se ata po kërkojnë nga Serbia të mbështesë sanksionet dhe sigurisht të mos lejojë që ato të anashkalohen.

Në fjalimet e tij, Vuçiq u përpoq t’i shpjegojë publikut problemet me të cilat po përballet Serbia, aq më tepër që edhe nëse nuk vendos sanksione ndaj Rusisë, ajo mund të marrë naftë dhe gaz vetëm përmes vendeve të Bashkimit Evropian, kryesisht Kroacisë.

Sa i përket Kosovës, presidenti serb beson se me aplikimin për anëtarësim në Këshillin e Evropës, Kosova ka shkelur obligime të ndryshme, përfshirë Marrëveshjen e Uashingtonit.

Në anën tjetër, Kosova beson se angazhimi ka qenë për një moratorium njëvjeçar dhe kërkesa për anëtarësim në Këshillin e Evropës, e më pas në Partneritetin për Paqe në NATO, ku me këto pritet të forcohet subjektiviteti juridik ndërkombëtar i shtetit.

Këshilli i Evropës ka konfirmuar se ka pranuar aplikacionin zyrtar të Kosovës për anëtarësim.

Continue Reading

Aktuale